நீங்கள் தேடியது "சென்னை போலீஸ்"

பெரம்பூர்:

வில்லிவாக்கம் அடுத்த ராஜமங்கலத்தை சேர்ந்த பிரபல ரவுடி குங்பூ குமார். இவரது பிறந்தநாள் விழாவிற்கு சென்னையில் உள்ள பல்வேறு பகுதிகளை சேர்ந்த ரவுடி கும்பல் ஒரே இடத்தில் திரளுவதாக போலீசாருக்கு ரகசிய தகவல் கிடைத்தது.

இதையடுத்து போலீசார் உஷார் படுத்தப்பட்டு தீவிர கண்காணிப்பில் ஈடுபட்டனர். இந்தநிலையில் புளியந்தோப்பு பகுதியில் வாகன சோதனையின்போது காரில் அரிவாளுடன் வந்த மாதவரம், மாரியம்மன் கோவில் தெருவை சேர்ந்த சரவணனை போலீசார் கைது செய்தனர்.

அவர் கொடுத்த தகவலின்படி கூட்டாளிகளான கொளத்தூரை சேர்ந்த சிவா, புளியந்தோப்பை சேர்ந்த கோபால், ரமேஷ் ஆகியோரை பிடித்தனர். அவர்களிடம் இருந்து 2 கார்கள், 8 அரிவாள்கள், செல்போன்கள் பறிமுதல் செய்யப்பட்டன. பிரபல ரவுடி குங்பூ குமாரின் பிறந்த நாள் விழாவில் பங்கேற்று விட்டு திரும்பி வந்ததாக அவர்கள் கூறினர்.

கைது செய்யப்பட்ட சரவணன் வட சென்னையை கலக்கி வந்த பிரபல தாதா சின்னா என்கிற கேசவலுவின் கூட்டாளி ஆவார். ஆந்திராவில் சட்டம் படித்த இவர் மீது கே.கே. நகரை சேர்ந்த காஞ்சீபுரம் வரதராஜ பெருமாள் கோவில் மேலாளர் சங்கர ராமன் கொலை வழக்கில் முக்கிய குற்றவாளியான கதிரவன் கொலை வழக்கு உள்பட 6 வழக்குகள் உள்ளன.

மேலும் சின்னாவை கொலை செய்த ரவுடி ஆற்காடு சுரேசை தீர்த்து கட்ட திட்டமிட்டதாகவும் கைதானவர்கள் தெரிவித்து உள்ளனர்.

கைதான சரவணன் உள்பட 4 பேரையும் போலீசார் புழல் சிறையில் அடைத்தனர். கடந்த பிப்ரவரி மாதம் மாங்காடு அருகே நடந்த ரவுடி பினு பிறந்த நாள் கொண்டாட்டத்தில் பங்கேற்ற 72 ரவுடிகள் கைது செய்யப்பட்டனர். இதில் சரவணனும் ஒருவர் என்பது குறிப்பிடத்தக்கது. ரவுடி பிறந்தநாள் விழாவில் ரவுடி கும்பல் அரிவாளுடன் ஒன்று திரண்ட சம்பவம் மீண்டும் பரபரப்பை ஏற்படுத்தி உள்ளது.

இந்த விழாவில் எந்தெந்த பகுதி ரவுடிகள் பங்கேற்றனர் என்பது குறித்த பட்டியலை போலீசார் சேகரித்து வருகின்றனர். அவர்கள் மீது கைது நடவடிக்கை பாயும் என்று தெரிகிறது.

சென்னை:

தீபாவளி பண்டிகையின் போது பட்டாசு வெடிக்க சுப்ரீம் கோர்ட்டு கட்டுப்பாடு விதித்துள்ளது. இரவு 8 முதல் 10 மணி வரை மட்டுமே பட்டாசு வெடிக்க வேண்டும் என்று உத்தரவிட்டுள்ளது.

சுப்ரீம் கோர்ட்டின் இந்த உத்தரவுக்கு ஆதரவை விட எதிர்ப்பே அதிகமாக உள்ளது. துணை ஜனாதிபதி வெங்கையா நாயுடுவின் மகள் தீபா உள்பட பல பிரபலங்களும் சுப்ரீம் கோர்ட்டு தீர்ப்புக்கு அதிருப்தி வெளியிட்டுள்ளார்கள்.

இந்த தீர்ப்புக்கு எதிராக தமிழக அரசு மேல்முறையீடு செய்தது. மனுவை விசாரித்த சுப்ரீம் கோர்ட்டு 2 மணி நேரம் மட்டுமே பட்டாசு வெடிக்க வேண்டும் என்பதை திட்டவட்டமாக அறிவித்தது.

ஆனால் தமிழகத்தில் பட்டாசு வெடிக்கும் நேரத்தை அரசு முடிவு செய்து கொள்ளலாம் என்று அறிவித்தது. அதன்படி காலை 6 மணி முதல் 7 மணி வரையும், இரவு 7 மணி முதல் 8 மணி வரையும் பட்டாசு வெடிக்கலாம் என்று தமிழக அரசு அறிவித்தது.

தீபாவளி பண்டிகைக்கு நாளை முதல் நாளை மறுநாள் வரை பட்டாசு வெடிப்பார்கள். இதையொட்டி சுப்ரீம் கோர்ட்டு உத்தரவை அமல்படுத்துவதற்கான நடவடிக்கைகளை காவல்துறை எடுத்து வருகிறது.

அனுமதிக்கப்பட்ட நேரத்தை விட கூடுதலான நேரம் வெடித்தால் நடவடிக்கை எடுக்கப்படும் என்று எச்சரித்துள்ளார்கள்.

கோர்ட்டு உத்தரவை மீறி பட்டாசு வெடித்தால் இந்திய தண்டனை சட்டம் 188-வது பிரிவின் கீழ் 6 மாதம் ஜெயில் அல்லது ஆயிரம் ரூபாய் அபராதம் அல்லது இரண்டையும் சேர்த்தும் விதிக்கப்படும்.

18 வயதுக்கு உட்பட்டவர்கள்தான் அதிக அளவில் பட்டாசு வெடிப்பார்கள். அவர்களுக்கு அறிவுரை வழங்கி கோர்ட்டு தீர்ப்பு அமல்படுத்தப்படும்.

அனுமதியை மீறி பட்டாசு வெடிப்பவர்களை முதலில் எச்சரிக்கவும் தொடர்ந்து வெடித்தால் நடவடிக்கை எடுக்கவும் போலீசார் திட்டமிட்டுள்ளார்கள். #Diwali #Crackers #ChennaiPolice #SC